[Allgemein
]
12 September, 2008 20:47
12.09.2008: Vancouver
Mir händ euse Camper abgeh und sind jez im Hotel ahcho. Wär jez na cool gsi grad an Flughafe und Hei flüüge. Will da ume hänge bringt’s nöd würkli. s’Hotel isch ide Nöchi vom Flughafe... Aso id City chömer nüme guet vo da.
Egal, jez hani Ziit zum dPic’s ordne, sortiere, lösche und so. Und ebe wider mal de Blog ufe lade – mit de Bäre-Story! *hihi*
Fazit vo dene Ferie: In Vancouver muess mer eifach immer en Coffee to go ide Hand ha und gstresst ume laufe... z’Vancouver Island isch alles locker, langsam und mer brucht dringend es Surfbrätt! Und im Norde obe muess mer unbedingt immer es Kanu debii ha!
Es isch mega gsi... händ mega viel gseh und’s total gnosse. Vier Wuche Ferie am Stuck sind mega geil! 
Han mich unsterblich ines Auto verliebt da... En Ford EDGE!!! In schwarz, tönti Schiibe.... *rrr* Jetzt heisst's spare, spare, spare und dänn importier ich sones Baby!
Ich bin ganz sicher nöd s’letscht Mal da bide Canucks gsi!!! Aber freu mi jez au wider uf di Hei uf miini Liebschte, feins Brot und „normali“ French-Salatsauce!
Hoffe, Ihr händ chli de Plausch gha a miim Ferie-Report.
Big kiss,
Dane
[Allgemein
]
12 September, 2008 20:33
11.09.2008: Back in Vancouver
Hüt simer vo Whistler entlang vo u-vielne Baustelle gfahre und schliesslich in Vancouver ahcho. Händ da na en Camping gfunde für e Nacht... na relativ nöch – 20Min. mitem Skytrain id City.
Sind dänn au grad los id City wo mir eus ja jez scho uskänned.
Ändlich hani nachli Ziit für Shopping gha und im ROOTS bini fündig wurde! *yeah*
En Drink ide Gartebeiz und na de Rückflug bestätigt. Obwohl mir ja eh gern na würded wiiteri 4 Wuche ahhänke... Dänn simer na ide Rocky Mountain Chocolate Factory (www.rockychoc.com) gsi und hand eus en Caramell-Öpfel ine zoge *mjaaammmm*
Morn müemer euses Super-Mobil zrugg geh bide Fraserway… Ich wirds cho chli vermisse – isch supi gsi immer s’Bett und s’WC debii z’ha
[Allgemein
]
12 September, 2008 20:25
10.09.2008: Whistler
Hüt am Morge isch eifach de GEILSCHT passiert. Mir sind im Camper gmüetlich am zmörgele, won ich rächts luege, gsehn ich en schwarze Arsch. „Schatz, en Bär – oder evtl. au nur en Hund!“ Dänn treit er sich um und es isch en Schwarzbär! *shit* Mir isch schier de Toast zum Muul us gheit.
Woni s’Fänsterli ufgmacht han, hät er grad gluegt und lauft volle Hahne uf eus zue! Ich mit de Filmkamera vollgas am filme, de Beat am föttele wie en Wilde. Dänn seit de Beat: „mach s’Fänschter zue Schatz!“ und ich voll im Bäre-Flash wäredem Filme s’Fänster am zue rigle. Dänn ischer um de Camper ume gloffe. Nacher ischer hine wider ume cho und wo de Beat s’Fänsterli ufgmacht hät, ischer grad wider cho! Zägg, Fänsterli wider zue und de Bär stiigt vollgas uf d’Hinderbei und chratzt a eusem Fänster... staht eifach mal de Bär a eusem Camper und chratzt am Fänster! *so geil*
Ich han na gseit, es sig so en Herzige und eher en Chliine. Aber wo mir nacher gluegt händ, woner dusse kratzt hät... hämer gmerkt, dass wänn ich deet stah, ich nöd ufe mag. Aso ischer sicher über 1.70m gsi!
De Bescht isch ebe, dass mir am Morge vome Chratze verwachet sind. De Beat isch grad ufgjukt und ich han na so easy gseit: „ah Schatz, das isch sicher eifach en Vogel wo ufem Dach glandet isch!“ ... JA GENAU!
Nach dem geile Bäre-Früehstück simer ga Whistler abchecke. Isch mega herzigs Städli mit Fuessgängerzone und vielne Läde, Cafis und Reschtis. S’Wätter isch au supi gsi, strahlend blaue Himmel und super schöni Berge rund um!
Mir sind dänn mitem Gondeli ufe gfahre... en churze Trail gloffe und na mitem Sässeli ufe. Deet obe hämer es super Panorama gha und en mega feine Angus-Burger mit Fries gmampft. Da obe isch en Traum für Downhill-Biker! Die chönd da vo zoberscht uf diverse Bahne is Tal abe säue... Es hät sogar schwarzi Pischte! Aber alli schön mit Helm, Schoner und so. Hät rächt viel krassi Type da obe aber sogar Downhill-Chicks hät’s!
Nacher hämer na e rundi Golf gspielt ufem Platz da bim Camping. Zum Erstuune han sogar ich emal gunne!!! 
Bear-Adrenaline bringt’s, hehe
[Allgemein
]
11 September, 2008 01:34
09.09.2008: Whistler
Hüt bin ich super-mässig drivet und zwar ganzi 400 Km lang! Händ eigentlich wele zwüsched ine einisch campe aber will da uf de Fahrt vo Kelowna uf Whistler eh nöd viel los gsi isch, simer grad dure blochet!
Isch krass, wie da vom einte zum andere Kilometer plötzlich alles wie ide Wüeschti isch! Alles total troche und trotzdem sinds überall chli am buure.
Dänn hämer mal wider ame View Point ahghaltet und nacheme churze Trail simer am Joffre Lake ahcho. s’Wätter isch perfekt gsi und mir händ en super Berg vor eus gha miteme Gletscher und une de friedlich See... *herrlich* In Whistler ahcho simer ufe Campingplatz Riverside –> isch ebe de einzig Campingplatz da. Im Vergliich zude bisherige Plätz isches da grad dopplet so tüür!
57 Döller pro Nacht isch scho gnueg... aber ebe, Whistler sig ja anschiinend s’St. Moritz vo Canada. Defür sind d’Alag und d’Duschene mega schön und es hät sogar en huus-eigne Minigolf-Platz.
Han scho mal s’Pländli vo Whistler-Downtown studiert. Tönt aso na guet, bin sehr gspannt, wies deet usgseht. Händ jez vori na s’letscht Mal grilliert und gönd jetzt ga pfuuse... isch en lange Tag gsi. Morn mache mir Whistler unsicher und wänn’s Wätter passt gömer mitem Gondeli ufe!
[Allgemein
]
11 September, 2008 01:25
08.09.2008: Kelowna
Hüt simer uf Kelowna gfahre. Uf de Fahrt hät’s das Mal nöd so wahnsinnig viel z’gseh geh womer händ chöne ahhalte. Aber es isch au nöd so wiit gsi und ich bin da inzwüsche sowieso de Super-Insider-Driver mit eusem Mobil.
Bi "the Last Spike" hämer ahghaltet. Deet isch am 7.11.1885 de letscht Nagel id Schwelle vode erschte kanadische transkontinentale Isebanh gschlage wurde. z’Kelowna ahcho simer mal ufe Campingplatz, da grad 3 Km weg vo Downtown. Dänn hämer eus ufgmacht ga d’Stadt abchecke. Ich han mich scho ufs Shoppe gfreut, cooli Garte-Bezli und so. Aber leider isch die Stadt da voll im Ami-Style: riesig und nur mit Auto erkundbar. Es hät am Highway nah diversi Läde binand wo zäme sone Art „Zentrum“ bilde und eis grosses Shopping-Center. Da isches dänn z’Banff aso scho viel schöner gsi...
Mir sind dänn am Hafe une de Promenade nahgloffe. Deet isch mega friedlich gsi, hine es Pärkli und meeeeeega geili Wakeboard-Boot!!! *rrr* Da händ miini Äugli natürlich grad ahfange glänze...
Händ dänn doch na es Pub gfunde mit Gartebeizli und en Drink gnosse, bis d’Sunne abe isch. Grad ide Nöchi hät’s es bonzigs Hotel mit Golfplatz gha und näbedra grad s’Casino. Bis as Hotel ane und hindere im & um de Golfplatz isch Wasser gsi. Und d’Bonze chönd so mitem Böötli dur d’Schleuse fahre und mitem Boot bim Casino ahlegge oder zum Golfplatz böötle. Zimli geil die Sach da!
Jaja... Gäld müesst mer ha!
Will suscht nöd viel los isch, gömer morn wiiter. De Taxidriver hät eus vori na bim Heifahre gseit, dass da nur im Juli, Auguscht voll d’Poscht abgaht und jez tote Hose isch.
[Allgemein
]
08 September, 2008 04:42
07.09.2008: Revelstoke
Hüt simer über de Rogers Pass gfätzt und händ zimli blaue Himmel und Berge gseh! Isch gewaltig gsi.... so hättis immer söle si wätter-technisch.
Revelstoke sälber isch nöd so gross und au nöd viel los. Aber mir sind ime coole Camping grad diräkt am See. Es hätti sogar na Pedalos wos vermietet
Ein Freak isch sogar na am bade gsi wo mir cho sind! Tämperaturmässig hämer hüt Nami mal ändli Summer gha und nachli chöne ade Sunne chille.
Nacher simer na ga de Revelstoke-Staudamm ahluege. Bim Ihgang simer na voll gfilzt wurde vom Portier! Er hät miteme Spiegel under de Van gluegt und gseit, er müesi au na ine ga luege. *shit* hämer dänkt... was lauft dänn da? Mir sind doch kei Terrorischte. Nacher hämer chöne füre fahre zum Parkplatz und dine hät’s en Lift gha womer händ chöne bis ufe fahre! Dobe uf de Staumuur hämer chöne abeluege – aber leider kei Fötteli mache! De Portier hät ebe gseit: nur mir und Gäld dörfed ine (kei Cams, Handy, Täschli usw.) Aber mir händ dänn vo de Strass obe her es Fötteli gmacht!
Dänn simer ufem Heiweg e Strass falsch abboge und händ dänn prompt euse lang ersehnti Grizzly-Bär gseh!!! *unglaublich* isch es Siiteströssli gsi woner uf de lingge Siite gsi isch. Und woner eus gseh hät cho, ischer grad über d’Strass rächts wider is Wäldli abgsecklet. Aber mir händ ihn gseh – sicher 5 Sekunde!!!
[Allgemein
]
07 September, 2008 05:13
06.09.2008: Banff
Hüt isch de ganz Tag Banff ufem Programm gstande. Es hät tuusig Souvenir-Shops womer nachem Dritte merkt, dass eh alli öpe s’Gliche händ. Zwüschedure hät’s aber au rächt cooli Surfer-Shops, Sportläde und riesigi Süessigkeite-Shops! *mjamm*
Dänn hämer dänkt, mir gönd ide Hot Springs ga bade, wämer scho mal da sind. Aber dä huere Touri-Uflauf hämer eus dänn erspahrt. Scho ufem Parkplatz hät’s jenschti Auto’s gha und womer ufe gloffe sind, hämer es Mini-Bad mit Tuusig Lüüt drin gseh. Mer hät sich ja chum chöne bewege i dem Fleisch-Huufe. Händ dänn rächts umkehrt gmacht und sind wiiter gfahre.
Über de Fluss gas legendäre Hotel „The Fairmont Banff Springs“ ahgugge. Händ chöne uf zwei Stöck chli ga luege – isch gewaltig die alte Muure und wie riesig das Ganze isch! Hät grad i zwei Sääl Hochziits-Vorbereitige gha à hüt isch ja Samschtig. Vorne sinds mit de fette Chäre vorgfahre und händ em Carboy de Schlüssel id Händ druckt. Scho chli anderi Lüüt als bi eus da ufem Camping-Platz...
Nacher simer susch nachli ume gfahre und händ ade Look-Out’s ahghaltet und „glookt“. Aber leider immer na kein Bär gseh! *mann*
[Allgemein
]
07 September, 2008 05:09
05.09.2008: Banff
Au hüt simer wider bi Ziite uf und los düüset. Sind ufem Icefields Parkway (230Km lang) gfätzt. National Geographic Magazine seit: one of the Worlds Ten Greatest Drive’s!
Sind verbii cho ade Athabasca-Falls, mind. 20 türkies-grüene Seeä und öpe tuusig 3’000-er Berge. Mir händ viel Gletscher gseh – isch mega ihdrücklich gsi. Dänn simer am Columbia-Icefield ahcho und duruf gloffe zum „legendäre“ Gletscher. Es hät sogar es Täfeli gha ufem weg ufe: 1982, the glacer was here!
Dänn simer über de Sunwapta-Pass (2’030m) gfahre und nach wiitere Kilometer schlussändlich am Moraine-Lake ahcho. Isch en türkies-klare See umgeh vo riese Berge *wunderschön*! Deet hämer na ufeme Felse es Streifehörnli gseh und chöne föttele!
Nacher simer hindere zum Lake Louis gfahre – deet muess mer ja fascht ane, oder? Isch ja schliesslich s’meischt bsuechtischte Bergseeli uf de Wält! Aber es isch nöd so krass gsi... voll de Touri-Träffpunkt miteme riese Hotelbunker denäbe.
[Allgemein
]
07 September, 2008 05:04
04.09.2008: Jasper
Hüt Morge simer am nüüni scho parat gsi sind hindere richtig Maligne Lake gfätzt. Uf de Strass deet hindere hät’s wider Warnschilder gha wäge Viicher wo chönnted über d’Strass ränne... aber gseh hämer glich wider keis! Isch gewaltig die Berge wo’s da rund um hät! Zerscht isch de Medicine Lake cho und nacher simer am Maligne Lake ahcho. Das isch de längscht (22Km) und tüüfscht (97m) See im Jasper Nationalpark.
Dänn simer mitem Böötli zude „Spirit Island“ gfahre
– es MUSS wämer scho da isch.
De Campingpatz isch so gross, dass mir mitem Camper müend füre fahre ga dusche! Hät im Gsamte 800 Plätz... Am Abig hämer na Jasper-Downtown usgangsmässig abcheckt, isch aber nöd viel los. Zwei Pub’s häts gha mit chli Sound, Billardtisch und so. Aber es hät’s tah – sind eh uf de Schnure gsi. Und mir sind ja nöd wägem Usgang da.
[Allgemein
]
07 September, 2008 04:59
03.09.2008: Jasper
Hüt hämer namal es paar hundert Kilometer hinder eus glah und sind in Jasper ahcho. Isch en riesige Nationalpark mit ändlose Wälder! Eifach gigantisch die Berge und vorne alles volle Wald und suscht eifach NÜT
Ufem Weg is Zentrum hämer sogar es paar Hirsche gseh näb de Stass. Glaube, da hät’s das Mal würkli chli Viicher ume und nöd nur Warn-Schilder
Jasper sälber isch mega herzig sone Strass mit alles chliine Lädeli. Sogar Reschti’s, Kafi’s und Pub’s häts! *wow* Halt alles voll uf Touri aber glich na cool mal wider chli Lüüt und Läde z’gseh. Es hät mega viel Schwiizer da! Überall ghöred mir d’Lüüt schwiizerdütsch schnure.
Nacheme feine Steak hämer dänn de Tag näb eusem Camper bim Füürle usklinge lah.
